撰文：八爪魚家長梁永樂
殿堂級親子KOL麥太（即麥兜阿媽）有云：「從前有個小朋友講大話，第二日，佢死咗⋯⋯」教導小朋友甚麼叫做後果和代價，家長責無旁貸。於是，昨天我和言妹在飯桌旁展開以下對話：
言：食飯食剩一半，唔該爸爸包底。
爸：咩態度，次次要我包底，你知唔知道我付出的代價好大？
言：乜嘢系代價？
爸：代價即系後果（亂咁答），食得多的代價，就系會肥。
言：但系你本身都好肥。（秒殺）
爸：你食剩飯都有代價，我會收起你啲糖，睇你仲敢唔敢食剩。（老羞成怒）
言：嗚⋯⋯我食糖唔肥，你唔食糖都好肥。
爸：我肥都系因為成日要同你地包底。（越答越傷心）
食剩飯要收糖，否則包底王爸爸只會愈來愈肥。自大仔希哥出世以來，我的體重上升了三成有多，因此必須立即制止小朋友隨意食剩飯，否則肥爸將要為此付出沉「重」代價。
事實上，我們每天丟棄的垃圾，也令香港的環境付出代價，這裡說的不是亂拋垃圾罰款千五之類的後果，而是在過去三十年間，香港的人口增長不過三成，但是都市固體廢物總量卻增加了接近84%，遠遠跑贏大市。那就是因為，大家都認為丟垃圾無代價，但其實處理廢物的過程中，除了佔用寶貴的土地（相信香港人對此最感「肉赤」），亦耗用了不少人力物力⋯⋯這些「成本」，香港人過去沒有想過要承擔，但多個亞洲城市包括首爾和臺北，都已經實施固體廢物收費多年並取得成效，為甚麼香港市民不可以共同承擔呢？
囉囉唆唆的跟言妹說了一大輪⋯⋯「爸爸，你平日咁多廢話，我可唔可以向你收費，幫你減廢，一齊共同承擔？」
